ახალი ამბები

ბათუმის შოთა რუსთაველის სახელმწიფო უნივერსიტეტს სინოპის უნივერსიტეტის დელეგაცია ეწვია სინოპის უნივერსიტეტის რექტორის მოადგილის, პროფესორ მუჰითდინ ილმაზის ხელმძღვანელობით. ბსუ-ს რექტორთან, პროფესორ მერაბ ხალვაშთან გამართულ შეხვედრაზე სინოპის უნივერსიტეტის წარმომადგენლებმა უნივერსიტეტებს შორის ტურიმზისა და არქეოლოგიის მიმართულებით თანამშრომლობის გაღრმავებასა და სამომავლო გეგმებზე იმსჯელეს. დაიგეგმა ერთობლივი პროექტების განხორციელება, სტუდენტებისა და პროფესორ-მასწავლებლებისათვის გაცვლითი პროგრამების ამოქმედება და სამეცნიერო კონფერენციის ჩატარება. შეხვედრის ფარგლებში, ბსუ-ს რექტორმა, პროფესორმა მერაბ ხალვაშმა და სინოპის უნივერსიტეტის რექტორის მოადგილემ, პროფესორმა მუჰითდინ ილმაზიმ თანამშრომლობის მემორანდუმს მოაწერეს ხელი.

ბათუმის შოთა რუსთაველის სახელმწიფო უნივერსიტეტის ტურიზმის ფაკულტეტი ტურიზმისა და სასტუმრო აღჭურვილობის მე-15 საერთაშორისო გამოფენაში - „EBIT - 2024’’ მონაწილეობს. სტუდენტებმა და პროფესორ-მასწავლებლებმა დამთვალიერებლებს ტურიზმის საგანმანათლებლო პროგრამა, საუნივერსიტეტო ცხოვრება, სერვისები, გააცნეს და ტურისტული პროდუქტები წარუდგინეს. ვიზიტორებს ასევე შესაძლებლობა მიეცათ, VR-სათვალის საშუალებით ვირტუალურად ემოგზაურათ საქართველოს სხვადასხვა კუთხეში, გაცნობოდნენ ქვეყნის ტურისტულ პოტენციალს, რესურსებსა და მარშრუტებს. გამოფენა სამ დღეს გაგრძელდება და მისი მიზანია ტურისტული მიმართულებით მომუშავე კომპანიებს შორის თანამშრომლობის დამყარება და ახალი კონტაქტების მოძიება.

ბათუმის შოთა რუსთაველის სახელმწიფო უნივერსიტეტს საინფორმაციო კამპანიის ფარგლებში, ბრიტანეთის საელჩოს წარმომადგენლები ჯორჯინა ჰარსმვორთი და სოფიო ბერიშვილი ეწვივნენ. დიპლომატიური კორპუსის წევრებმა სხვადასხვა ფაკულტეტის სტუდენტებისათვის საქართველო-ბრიტანეთის ურთიერთობების თემაზე საჯარო ლექცია წაიკითხეს და ორ ქვეყანას შორის არსებული თანამშრომლობის გამოცდილებასა და პერსპექტივებზე იმსჯელეს. ღონისძიებაზე ბრიტანეთის საელჩოს წარმომადგენლებმა სტუდენტებს ასევე წარუდგინეს ჩივნინგის სატიპენდიო სამაგისტრო პროგრამა და მასში მონაწილეობის პირობები.

საქართველოს უნივერსიტეტების ბავშვთა უფლებათა ცენტრების ქსელის 2024 წლის შეხვედრის მონაწილეებმა და ბავშვის უფლებების ადვოკატებმა ხელი მოაწერეს ბავშვის უფლებების აკადემიური ქსელის ჩამოყალიბების დეკლარაციას. აკადემიური ქსელი ითვალისწინებს, შექმნას ხელსაყრელი გარემო აკადემიური ძიების, კვლევისა და ადვოკატირებისათვის, რომელიც მიზნად ისახავს ბავშვის უფლებების რეალიზაციის გაძლიერებას. წევრები ქსელს გამოიყენებენ როგორც პლატფორმას ბავშვის უფლებების ხელშეწყობისა და დაცვის კუთხით იდეების, პრაქტიკის, მოსაზრებების, გამოცდილებისა და რესურსების გასაცვლელად. გაერთიანება ასევე ხელს შეუწყობს სხვა ქვეყნების აკადამიურ ქსელებთან პარტნორობას ბავშვის უფლებების ცოდნის, სამეცნიერო-კვლევითი მუშაობის, ადვოკატირების პრინციპებისა და პრაქტიკის გასაზიარებლად.

ბათუმის შოთა რუსთაველის სახელმწიფო უნივერსიტეტმა საქართველოს უნივერსიტეტების ბავშვის უფლებების ცენტრების წარმომადგენლებს უმასპინძლა. ორდღიანი შეხვედრა ბსუ-ს ბავშვთა უფლებების ცენტრში გაიმართა და ითვალისწინებდა ცენტრების მდგრადი ზრდის ხედვის, პრიორიტეტული სფეროების და სტრატეგიის განსაზღვრას, ძლიერი და სუსტი მხარეების, შესაძლებლობებისა და საფრთხეების იდენტიფიცირებასა და თითოეული ცენტრისთვის მორგებული სამუშაო გეგმების შემუშავებას. შეხვედრის მონაწილეებს მიესალმნენ და ნაყოფიერი სამუშაო შეხვედრა უსურვეს UNICEF წარმომადგენელმა საქართველოში იესპერ მოლერმა, ბსუ-ს რექტორის მოადგილემ, პროფესორმა ანზორ ბერიძემ, ზუსტ მეცნიერებათა და განათლების ფაკულტეტის დეკანმა, პროფესორმა ლელა თურმანიძემ.